ඡන්දය ප්‍රකාශ කිරීමට අවශ්‍ය මූලික කටයුතු සියල්ලම සූදානම්....

දිස්ත්‍රික් තේරීම්භාර නිලධාරි/දිස්ත්‍රික් ලේකම් කියයි.

2024 ජනාධිපතිවරණයට අදාලව ඡන්ද පෙට්ටි නිකුත් කිරීම සහ ඡන්ද පෙට්ටි ප්‍රවාහනය කිරීම සම්බන්ධයෙන් පුත්තලම දිස්ත්‍රික් තේරීම්භාර නිලධාරි එච්.එම්.එස්.පි.හේරත් මහතා මෙසේ අදහස් පලකළේය.

පුත්තලම දිස්ත්‍රික්කයේ ඡන්ද විමසීමට අදාලව ඡන්දදායකයින් 663,637 දෙනෙකු සුදුසුකම් ලබා තිබේ. ඉන් 14967දෙනෙකු තැපැල් ඡන්දය භාවිතා කිරීමට සුදුසුකම් ලැබුවා. එම සුදුසුකම්ලාභින්ගෙන් 98% වැඩි ප්‍රමාණයක් ඡන්දය පාවිච්චි කර දිස්ත්‍රික් ලේකම් කාර්යාලයට ලැබී තිබේ.

ඊට අමතරව අද දින ඡන්ද මධ්‍යස්ථාන 470ක් සඳහා ඡන්ද ස්ථානාධිපතිවරුන් ඡන්ද පෙට්ටි සහ පත්‍රිකා සමඟ අදාල මධ්‍යස්ථාන වෙත වාර්තා කර තිබෙනවා. සහකාර තේරීම්භාර නිලධාරින් ද මේ වන විට මැතිවරණ රාජකාරි සඳහා ක්ෂේත්‍රයට යොමු කර ඇත.ඒ අනුව හෙට උදෑසන 07.00 වන විට ඡන්දය පාවිච්චි කිරීමට අවශ්‍ය සියලු කටයුතු සුදානම් බව ඒ මහතා පැවසීය.

මේ වන විට ඡන්ද ගණන් කිරීමේ මධ්‍යස්ථාන දෙකක් ස්ථාපිත කර තිබේ. ඒවා වන්නේ පුත්තලම ශාන්ත ඇන්ඩෲ විද්‍යාලය සහ පාතිමා බාලිකා විද්‍යාලය වේ. මෙහි සාමාන්‍ය ඡන්ද ගණන් කිරීමේ මධ්‍යස්ථාන 54 හා තැපැල් ඡන්ද ගණන් කිරීමේ මධ්‍යස්ථාන 08 ක් ලෙස මුළු ඡන්ද ගණන් කිරීමේ මධ්‍යස්ථාන 62 ක්‍රියාත්මක වේ. අවසන් ප්‍රතිඵල නිකුත් කිරීමේ මධ්‍යස්ථානය දිස්ත්‍රික් ලේකම් කාර්යාල ශ්‍රවනාගාරයේ ස්ථාපිත කර ඇත.

හෙට දින පස්වරු 04.15 වන විට තැපැල් ඡන්ද පත්‍රිකා ගණන් කිරීම ආරම්භ කළ හැකියි. ඒ අනුව පළමු ඡන්ද ප්‍රතිඵලය රාත්‍රි 10.30 – 11.00 අතර ලබා දීමට අපේක්ෂිත බවයි දිස්ත්‍රික් තේරීම්භාර නිලධාරීවරයා පවසන්නේ.

එමෙන්ම මැතිවරණ පැමිණිලි මේ වන විට 66 ක් වාර්තා වී තිබෙනවා. ප්‍රචණ්ඩ ක්‍රියා වාර්තා වන්නේ එකක්.

දිස්ත්‍රික්කය තුළ පිහිටි ලගා වීමට අපහසු ඡන්ද මධ්‍යස්ථාන දෙකක් ඇත. ඒ අනුව මොහොත්තුවාරම දූපතේ ඡන්ද මධ්‍යස්ථානය වෙත ඡන්ද පෙට්ටි ගොඩබිමින් ප්‍රවාහනය කර තිබේ. ඊට අමතරව මොහොත්තුවාරම දූපත් ප්‍රදේශවල ජනතාවට ප්‍රවාහන පහසුකම් නොමැති නිසා රජයේ මැදිහත්වීමෙන් ට්‍රැක්ටර් රථ සහ බෝට්ටු මගින් ප්‍රවාහනයට කටයුතු සලසා ඇත.

පුත්තලම දිස්ත්‍රික්කයේ වන අලි තර්ජන ඇති ප්‍රදේශයන් හි ඡන්ද මධ්‍යස්ථාන සඳහා වනජීවී දෙපාර්තමේන්තු නිලධාරීන්ගේ සහාය ලබා ගෙන තිබෙනවා

එමෙන්ම දිස්ත්‍රික්කයේ ආරක්ෂාව සඳහා සියලුම පොලිස් ස්ථාන හා ආරක්ෂක අංශ සූදානමින් සිටින බව දිස්ත්‍රික් තේරිම්භාර නිලධාරි/දිස්ත්‍රික් ලේකම් එච්.එම්.එස්.පි හේරත් මහතා පැවසීය.